CUISLE CEOIL : Coirm cheoil i gcomóradh ar Choláiste Gaeilge na hAirde Móire fadó
Tionólfar coirm cheoil speisialta comórtha le Cór Fear na nDéise in Eaglais Naomh Pól san Aird Mhór, Co Phort Láirge ar an Aoine, 27 Meán Fómhair.
Beidh amhráin a bhí le clos i gColáiste Deuglán, Coláiste Gaeilge rathúil a bhí lonnaithe i sráidbhaile cois cósta na hAirde Móire céad bliain ó shin, mar dhlúthchuid den gcoirm cheoil seo, atá á n-eagrú ag Oifig na Gaeilge de Chomhairle Cathrach agus Contae Phort Láirge.
Chomh maith le Cór Fear na nDéise, beidh Cór Pobail na hAirde Móire agus páistí ó Scoil Náisiúnta Deuglán Naofa san Aird Mhór ag canadh ag an ócáid speisialta seo.
Céad bliain ó shin, i mí Iúil 1924, d’fhoilsigh Mícheál Ó Foghlú, duine de bhunaitheoirí Choláiste Deuglán, leabhrán dar teideal Cuisle Ceoil’, bailiúchán amhrán na nDéise a bhailigh sé agus é ag taisteal mar thimire de chuid Chonradh na Gaeilge. Foilsíodh an leabhrán mar leabhar amhrán dóibh siúd a bhí ag freastal ar Choláiste Deuglán, a bhí lonnaithe in aice leis an bhfoirgneamh ina bhfuil an Round Tower Hotel sa lá atá inniu ann. Tá an coirm cheoil seo á n-eagrú mar chomóradh ar an gColáiste Gaeilge agus na hamhráin Ghaelacha a d’fhoghlaim lucht foghlamtha na Gaeilge ann i mblianta tosaigh an tSaorstáit.
“Le tacaíocht ó chlár Éire Ildánach Phort Láirge, tá áthas orainn an coirm cheoil speisialta seo a eagrú mar chomóradh ar Choláiste Deuglán,” arsa Máire Seó Breathnach, Oifigeach Gaeilge na Comhairle.
“Bhí an Ghaeilge fós in úsáid mar theanga pobail ag daoine áirithe san Aird Mhór suas go dtí lár an chéid seo caite agus bhí Coláiste Deuglán mar chroílár na Gaeilge agus an chultúir Ghaelaigh sa tsráidbhaile ó 1920 go dtí lár na 1940daí. Tá áthas orm go mbeidh Cór Fear na nDéise ag canadh amhrán ón leabhrán Cuisle Ceoil agus go mbeidh na cóir áitiúla pobail agus scoile san Aird Mhór ar an gclár chomh maith. Is slí iontach é an coirm cheoil seo chun cultúr agus traidisiún na Gaeilge san Aird Mhór fadó a chur ar a súile dos na glúnta níos óige agus beocht a chur sna hamhráin úd arís san ionad álainn, Eaglais Naomh Pól.”
Beidh coirm cheoil Cuisle Ceoil ar siúl in Eaglais Naomh Pól, Ard a’ Mhinistir, Aird Mhór ar a 7.30i.n. ar an Aoine, 27 Meán Fómhair. Cosnaíonn ticéidí €10 agus tá siad ar fáil ar Eventbrite ag an nasc https://www.eventbrite.ie/e/1012828004827/, nó lorg Cuisle Ceoil, nó trí r-phost a sheoladh chuig gaeilge@waterfordcouncil.ie.
