Clár Feabhsúcháin Áitiúil 2026 seolta ag Comhairle Cathrach agus Contae Phort Láirge
Tugtar cuireadh do ghrúpaí agus d’eagraíochtaí pobail i bPort Láirge iarratas a dhéanamh ar mhaoiniú faoin gClár Feabhsaithe Áitiúil (LEP) 2026.
Tá sé mar aidhm ag an gClár Feabhsaithe Áitiúil, arna mhaoiniú ag an Roinn Forbartha Tuaithe agus Pobail agus Gaeltachta agus arna riar ag LCDC Phort Láirge trí Chomhairle Cathrach agus Contae Phort Láirge, tacaíocht chaipitil a chur ar fáil do ghrúpaí agus d’eagraíochtaí pobail i bPort Láirge agus béim ar leith á leagan ar phobail faoi mhíbhuntáiste i gceantair thuaithe agus uirbeacha araon. Tacóidh cistiú LEP 2026 leis na deisiúcháin is gá agus le hoibreacha caipitil ar mhionscála, le ceannacháin trealaimh agus le feabhsuithe ar shaoráidí.
Leithdháileadh €219,286.41 san iomlán ar Phort Láirge i maoiniú do LEP 2026.
Agus é ag cur fáilte roimh an leithdháileadh do LEP 2026, dúirt Méara Chathair agus Chontae Phort Láirge agus Cathaoirleach LCDC Phort Láirge An Comhairleoir Séamus Ryan, “Cuireann an Clár Feabhsúcháin Áitiúil tacaíocht ríthábhachtach ar fáil do ghrúpaí agus d’eagraíochtaí pobail chun feabhas a chur ar a n-áiseanna nó chun trealamh a cheannach, rud a ligeann dóibh leanúint de sheirbhísí luachmhara a chur ar fáil do na daoine ina gceantar.”
Agus í ag trácht ar an gClár Feabhsúcháin Áitiúil, dúirt Orla Kelly, Oifigeach Riaracháin, Comhairle Cathrach agus Contae Phort Láirge, “In 2025 thacaigh an Clár Feabhsúcháin Áitiúil le 150 grúpa agus eagraíocht pobail i gceantair faoi mhíbhuntáiste ar fud Chathair agus Chontae Phort Láirge. Chonaiceamar go pearsanta conas is féidir leis na deontais seo difríocht mhór a dhéanamh, agus ba mhaith linn buíochas a ghabháil le gach duine a rinne iarratas in 2025 as an obair ríthábhachtach a dhéanann siad dá bpobail áitiúla. Mholfainn do gach grúpa a bhfuil suim acu cuairt a thabhairt ar shuíomh gréasáin na Comhairle chun faisnéis a fháil faoin gciste sin agus faoin gcaoi le hiarratas a dhéanamh.’
Ceann de na grúpaí a bhain tairbhe as deontas faoin gClár Feabhsaithe Áitiúil in 2025 ba ea Club Sacar Bhaile Uí Dhuibh. Dúirt an Cathaoirleach Paul Cleary, “Bhí ríméad orainn €500 a fháil tríd an gClár Feabhsaithe Áitiúil, rud a chuir ar ár gcumas dhá seit chúil bheaga láidre a cheannach dár nAcadamh. Úsáideann buachaillí, cailíní agus leanaí faoi mhíchumas na cúil seo go laethúil inár gclub anois, agus tá fíordhifríocht déanta acu maidir le timpeallacht shábháilte, spraíúil agus chuimsitheach a sholáthar do leanaí óga a ghlacann a gcéad chéimeanna sa sacar. Tá tacaíocht mar seo thar a bheith tábhachtach do chlubanna pobail cosúil linn féin agus bíonn tionchar buan aici ar ár bpobal áitiúil.”
Is féidir sonraí a fháil ag www.waterfordcouncil.ie/LEP. Is é an dáta deiridh d’iarratais ná 4pm Dé hAoine, 27 Feabhra 2026.
Reáchtálfar Seimineár Gréasáin Faisnéise agus Ceisteanna & Freagraí, arna éascú ag PPN Phort Láirge, ag 2pm ar an Déardaoin, 5 Feabhra 2026 agus scaipfidh PPN Phort Láirge sonraí an tseimineáir ghréasáin.
Beidh baill foirne ó fhoireann na nDeontas Pobail ar fáil freisin sa Lárleabharlann, Lána Mhuire ó 11am go 1pm Dé Máirt, 10 Feabhra agus i Leabharlann Dhún Garbhán ó 2pm go 4pm Déardaoin, 12 Feabhra chun eolas a chur ar fáil agus aon cheisteanna a d’fhéadfadh a bheith ag grúpaí pobail a fhreagairt.
